БА 27 ШАХСОНИ ҲУҚУҚӢ ИҶОЗАТНОМАИ ФАРМАТСЕВТӢ ДОДА ШУД

                 Душанбе, 27 июл. (АМИТ «Ховар», Ибодат Давлатова). -«Дар 6 моҳи соли ҷорӣ ба 27 шахсони ҳуқуқӣ иҷозатнома оид ба фаъолияти фарматсевтӣ дода шуд. Инчунин 17 иҷозатнома оид ба муомилоти қонунии воситаҳои нашъадор, моддаҳои психотропӣ ва прекурсорҳо ба расмият дароварда шудааст»,- қайд намуд Вазири тандурустии Ҷумҳурии Тоҷикистон Нусратулло Салимов.                Дар давраи сипаришуда ба маблағи беш аз 34 миллион доллари амрикоӣ ба ҷумҳурӣ маводи доруворӣ ва молҳои тиббӣ ворид карда шуд, ки аз онҳо беш аз 15 миллион доллар ёрии башардӯстона, беш аз 18 миллион доллар барои тиҷорат ва 1 миллион доллар бо мақсади истифодабарӣ ташкил додааст.                 Миқдори умумии маводҳои дорувории мӯҳлати истифодабариашон гузашта, қалбакӣ, шубҳанок ва аз қайди давлатӣ нагузашта аз дорухона ва муассисаҳои табобатию профилактикӣ 6127 номгӯй ба миқдори 274348 адад аз муомилот барои несту нобуд сохтан бозпас гирифта шудаанд ва бо иштироки комиссияи махсус ба миқдори 8450 кг маводи доруворӣ ва молҳои тиббӣ бо роҳи сӯзондан несту нобуд карда шуд.