МОҲИ АВГУСТ САНҶИШИ КОРХОНАҲОИ ХАТЛОН ШУРӮЪ МЕШАВАД

               Душанбе, 30 июл. (АМИТ «Ховар», Лаззат Диловарзод).- Бино ба иттилои сардори дафтари матбуоти Кумитаи сармоягузорӣ ва амволи давлатӣ Муҳаммадҷон Қосимов, Ҳукумати Ҷумҳурии Тоҷикистон бо мақсади муфлис эълон кардани корхонаҳое, ки фаъолияташон дар асоси оиннома ба роҳ монда нашудааст ва ё аз фаъолият боз мондаанд, комиссияи махсус таъсис дод.              Дар назар аст, ки комиссияи ҳукуматӣ аз аввали моҳи август ба санҷиши фаъолияти корхонаҳои вилояти Хатлон оғоз карда, аз кори онҳо ба Ҳукумати ҷумҳурӣ маълумот пешниҳод мекунад. Ҳукумати ҷумҳурӣ дар навбати худ корхонаҳои фаъолияташон суст ва умуман фаъолиятнадоштаро муфлис эълон мекунад.              Тибқи маълумоти Вазорати энергетика ва саноати Тоҷикистон дар кишвар 801 корхонаи саноатӣ ба қайд гирифта шудааст, ки аз он 130 корхона пурра аз фаъолият монда, боқимондаашон ба андозаи 50 фоизи иқтидори истеҳсолӣ фаъолият мекунанд. Аз ҷумла дар ВМКБ аз 12 корхона — 5, вилояти Суғд аз 235 — 138, Хатлон аз 234 — 142, шаҳри Душанбе аз 237 — 126 ва дар НТҶ аз 125 — 50 корхона фаъолият мекунад.