МУЛОҚОТИ ЭМОМАЛӢ РАҲМОН БО ПРЕЗИДЕНТИ ФЕДЕРАТСИЯИ РУСИЯ
Душанбе, 31 июл. (АМИТ «Ховар», Наргис Бояхмедова, Пайрав Назаров). — Президенти Ҷумҳурии Тоҷикистон Эмомалӣ Раҳмон бегоҳии дирӯз бо Президенти Федератсияи Русия Дмитрий Медведев мулоқот кард, ки барои боздиди корӣ ба Душанбе омадааст. Сарони ҳар ду давлат маҷмӯи масъалаҳои ҳамкории мамлакатҳояшонро мавриди баррасӣ қарор доданд. Онҳо аз анҷоми сохтмони НБО «Сангтӯда — 1» ва кушодани филиали Донишгоҳи давлатии Маскав ба номи Ломоносов дар Душанбе изҳори қаноатмандӣ намуданд. Зикр шуд, ки соли оянда дар Душанбе филиалҳои Донишкадаи энергетикии Маскав ва Донишкадаи пӯлод ва махлутҳои фулузоти Маскав кушода хоҳанд шуд. Сарони ҳар ду давлат дар бораи нақшаҳои дурнамои ҳамкорӣ ва муносибатҳои мамлакатҳояшон сухан ронда, зикр карданд, ки ҳамкориро дар соҳаҳои гидроэнергетика, саноати нафту газ, танзими муҳоҷирати меҳнатӣ ва бартараф сохтани оқибати бӯҳрони ҷаҳонии молиявию иқтисодӣ давом хоҳанд дод. Ҳамчунин масъалаҳои таъмини амнияти минтақа, мубориза ба муқобили маводи нашъадор ва зуҳуроти дигари номатлуби замони ҳозира мавриди баррасӣ қарор гирифтанд.Президенти Тоҷикистон зикр кард, ки ташрифи Д.Медведев ба анҷоми сохтмони НБО «Сангтӯда — 1» рост омад ва ин дар муносибатҳои иқтисодии Тоҷикистону Русия воқеаи муҳим мебошад. Ба истифода додани ин нерӯгоҳ на танҳо таъминоти Тоҷикистонро бо қувваи барқ беҳтар хоҳад кард, балки натиҷаи амалии ҳамкорӣ ва муносибатҳои стратегии мо мебошад, гуфт Э.Раҳмон. Д.Медведев зикр намуд, ки сохтмони НБО «Сангтӯда — 1» ҳақиқатан сохтмони хеле бузург ва муҳим буда, мамлакатҳо ва халқҳои моро бештар муттаҳид месозад ва бешубҳа ба манфиати ҳар ду кишвар истифода карда хоҳад шуд. Президенти Русия дар бораи муносибатҳои Тоҷикистону мамлакаташ сухан ронда, изҳор намуд, ки ин муносибатҳо дар оянда боз ҳам бештар ривоҷ дода мешаванд. Ин шаҳодат медиҳад, ки муносибатҳои мо хусусияти стратегӣ дошта, ҷавобгӯӣ манфиатҳои ҳар ду кишвар мебошанд. Моро дар оянда барномаҳои дигар интизоранд ва мо барои иҷрои онҳо якҷоя кӯшиш ба харҷ хоҳем дод, гуфт Д.Медведев. Дар фарҷоми мулоқот созишномаи ҳукуматҳои Тоҷикистону Русия дар бораи истифодаи якҷояи нерӯгоҳи мазкур имзо карда шуд. Сафари кории Д.Медведев дар Тоҷикистон давом дорад.
Имрӯз дар водиҳои Тоҷикистон ҳаво то 40 дараҷа гарм мешавад
Дар 130 муассисаи таълимии ноҳияи Рӯдакӣ беш аз 10 ҳазор наврасон ба истироҳат фаро гирифта шудаанд
Имрӯз дар ноҳияҳои алоҳидаи Тоҷикистон чангу ғубор ба амал меояд
Дар Душанбе ҳамоиши сиёсӣ-фарҳангӣ таҳти унвони «Пешвои миллат — меъмори Ваҳдат» доир гардид
МЕГАФОН ТОҶИКИСТОН: Дар Санкт –Петербург Созишнома оид ба ҳамкории оператор бо таҳиягари пешбари Русия — Ivideon имзо гардид
Конфронси илмӣ-адабии «Душанбе — корзори ваҳдатофарӣ ва боргоҳи Ваҳдати миллӣ» баргузор шуд
Дар Вилояти Мухтори Кӯҳистони Бадахшон 9 иншооти саноатӣ ба истифода дода мешавад
Дар Бохтар вобаста ба пешгирии ғарқшавии ноболиғону ҷавонон ҳангоми оббозӣ вохӯрии иттилоотӣ доир шуд
Модарони ваҳдатсаро дар ноҳияҳои Исмоили Сомонӣ, Фирдавсӣ, Сино ва Шоҳмансури пойтахт бо сокинон вохӯрӣ мегузаронанд
АЗ БАРАКАТИ ВАҲДАТИ МИЛЛӢ. Дар ин муддат соҳаи саноат ва кӯҳкорӣ ба як бахши муҳими иқтисоди миллӣ табдил ёфт
«ХИЗМАТ БА ВАТАН ШАРАФ АСТ!». Дар ноҳияи Нуробод ҳамоиши хизматчиёни ҳарбӣ баргузор мешавад
