РОҲҲОИ ҚИСМАТИ ҒАРБИИ ДУШАНБЕ ДАР АРАФАИ АЗНАВСОЗИСТ

                Душанбе, 27 июл.(АМИТ «Ховар», Марзия Саидова).-Мақомоти иҷроияи ҳокимияти давлатии шаҳри Душанбе доир ба азнавсозии се кӯчаи пойтахт- Соҳилӣ, Соҳилӣ- Ҷанубӣ ва Алишери Навоӣ тадбир андешид.                Мувофиқи қарорҳои Раиси шаҳри Душанбе Маҳмадсаид Убайдуллоев барои таҳияи ҳуҷҷатҳои лоиҳавӣ-харҷномавию оғози корҳои сохтмонии кӯчаи Соҳилӣ аз хиёбони С.Шерозӣ то бурриши кӯчаи Ҷомӣ», «Сохтмони роҳи автомобилгарди кӯчаи Соҳилӣ-Ҷанубӣ аз кӯчаи Ҷомӣ то пайваст ба кӯчаи Неъмат Қарабоев» ва «Азнавсозии кӯчаи А.Навоӣ (аз бурриши кӯчаи Б.Ғафуров то дарвозаи ғарбӣ») ба Сарраёсати ободонии шаҳри Душанбе иҷозат дода шуд.                Сарраёсати ободонии шаҳри Душанбе муваззаф шудааст, ки корҳои ҷустуҷӯӣ ва лоиҳакашии иншоотҳоро тибқи талаботи санадҳои меъёрии ҳуқуқии амалкунанда ва қоидаи меъёрҳои сохтмонӣ -шаҳрсозӣ иҷро намуда, ба сохтмону азнавсозии роҳҳо баъди дастрас намудани хулосаи Раёсати экспертизаи давлатии ғайриидоравии лоиҳаҳои Агентии сохтмон ва меъмории назди Ҳукумати Ҷумҳурии Тоҷикистон шурӯъ намояд.