ВАЗИР МИҚДОРИ МИНАҲОРО МУАЙЯН КАРД

                  Душанбе, 14 июл. (АМИТ «Ховар», Лаззат Диловарзод).-Вазири адлияи ҷумҳурӣ Бахтиёр Худоёров дар конфронси кушодаи байналмилалӣ дар мавзӯи «Табдили Осиёи Марказӣ ба минтақаи озод аз минаҳо» баромад карда иброз дошт, ки аз соли 2004 то имрӯз дар бештар аз 900 нуқтаҳои аҳолинишин корҳои тадқиқотӣ вобаста ба дараҷаи хавфнокии минаҳо дар пешбурди иҷтимоӣ — иқтисодии мардум гузаронида, беш аз 500 минтақаҳои хавфнок муайян карда шуданд.                Аз ҷониби мутахассисони дохилу хориҷи кишвар бештар аз 2 млн. 700 ҳазор метри квадратӣ аз минаҳо тоза карда шуданд. Дар нуқтаҳои хавфнок беш аз 4 ҳазор аломатҳои огоҳкунанда аз минаҳо гузошта шуданд. Дар ин муддат беш аз 12 ҳазор минаҳо нобуд сохта шуд. Баъд аз қабули қарори Конвенсияи Оттава дар бораи нест кардани минаҳои зидди пиёдагард даҳҳо давлатҳои аъзои ин конвенсия истеҳсол ва истифодаи минаҳои зидди пиёдагардро қатъ карданд.               Тоҷикистон ҳамчун давлати аъзои ин Конвенсия ҳамаи захираи минаҳои зиддипиёдагардашро несту нобуд сохта, барои тоза кардани майдонҳои минакоришуда фаъолона кор мебарад. Тоҷикистон барои аз мина тоза кардани ҳудудаш 9 солу 9 моҳ вақт талаб намуд, ки он аз ҷониби Комиссияи Ҳукумати Ҷумҳурии Тоҷикистон маъқул дониста шудааст.