ВКД ТОҶИКИСТОН ВА ПОКИСТОН ҲАМКОРӢ МЕКУНАНД

              Душанбе, 30 июл. (АМИТ «Ховар», Фарангис Раҳимова). — Дирӯз зимни мулоқоти вазири корҳои дохилии Ҷумҳурии Тоҷикистон Абдураҳим Қаҳҳоров бо вазири корҳои дохилии Ҷумҳурии Исломии Покистон Раҳмон Малик нақшаҳои ҳамкорӣ мавриди баррасӣ қарор гирифтанд. А.Қаҳҳоров зикр намуд, ки муносибатҳои дипломатии Тоҷикистону Покистон ҳанӯз соли 1992 ба роҳ монда шуда буданд ва то имрӯз байни ҳар ду кишвар дар масъалаи мубориза ба муқобили терроризм ва ғайра 22 ҳуҷҷат имзо шудааст.                Раҳмон Малик изҳор намуд, ки Тоҷикистону Покистон ва Афғонистон бояд муттаҳид гардида, дар мубориза ба муқобили зуҳуроти номатлуби замони ҳозира якҷоя кӯшиш ба харҷ диҳанд. Мо бояд дар ин бобат нақшаи муштараки стратегӣ дошта бошем, зикр кард Р.Малик.                 Меҳмон пешниҳод намуд, ки мақомоти муҳофизи тартиботу қонуни мамлакатҳои минтақа бояд дар масъалаи мубориза ба муқобили терроризм ба ҳамдигар маълумоти зарурӣ дода, таҷрибаи ҳамдигарро омӯзанд. Вазири корҳои дохилии Покистон пешниҳод кард, ки 10 нафар корманди ВКД Тоҷикистон барои омӯзиши таҷриба ба Покистон фиристода шаванд.                  Абдураҳим Қаҳҳоров зикр намуд, ки моҳи ноябри соли равон дар Душанбе бахшида ба масъалаҳои тақвияти мубориза ба муқобили терроризм мулоқоти намояндагони мамлакатҳои Осиёи Марказӣ, аз ҷумла Афғонистону Покистон баргузор мегардад. Вай Раҳмон Маликро даъват намуд, ки дар ин мулоқот ширкат варзанд.