15-СОЛАГИИ ТАЪСИСЁБИИ КУМИТАИ ҲОЛАТҲОИ ФАВҚУЛОДДА

                   Душанбе, 15 август. (АМИТ «Ховар», Ибодат Давлатова). — Ҳар сол, 17 август дар ҷумҳурӣ рӯзи кормандони ҳолатҳои фавқулодда ва мудофиаи гражданиро бо тантана ҷашн мегиранд.                   Бахшида ба ин рӯз, 15 августи соли равон дар маҷамааи давлатии «Кохи Ҷомӣ» ба муносибати 15-солагии таъсисёбии Кумитаи ҳолатҳои фавқулодда ва мудофиаи гражданӣ чорабинии идона баргузор гардид.                   Дар он паёми табрикии Сафармондеҳи Олии Қувваҳои Мусаллаҳи Ҷумҳурии Тоҷикистон, Президенти кишвар Эмомалӣ Раҳмонро, котиби шӯрои амният Амирқул Азимов ба ҳозирон расонид, ки дар он чунин қайд шуда буд, «Дар тӯли 15-соли фаъолияти ин сохтор, ки як ҷузъи Қувваҳои Мусаллаҳи Тоҷикистон маҳсуб ёфта, мо онро дар шароити душвори солҳои аввали фаъолияти давлати соҳибистиқлоламон мисли Артиши миллӣ дар ҷои холӣ, яъне бе мавҷудияти ягон заминаи мусоиди моддиву техникӣ ташкил карда будем, кормандону хизматчиёни он дар садҳо амалиёти наҷотдиҳӣ, пешгирии ҳолатҳои фавқулоддаи табиӣ, бартараф намудани оқибатҳои онҳо ва дастрас гардонидани кӯмакҳои башардӯстона чӣ дар дохил ва чӣ дар хориҷи кишварамон фаъолона иштирок кардаанд».                 Инчунин, дар охир консерти идона бо иштироки санъаткорони маъруф баргузор гардид.