АВВАЛИН БОР ДАР ҶУМҲУРӢ КАРТОШКА ДУРАГА КАРДА ШУД

               Душанбе, 21 август. (АМИТ «Ховар», Лаззат Диловарзод).- Бори аввал дар таърихи беш аз 100 — солаи картошкапарварии Тоҷикистон бо роҳбарии номзади илмҳои кишоварзӣ Қурбоналӣ Партоев, як гурӯҳ олимони ҷавон дар қитъаи замини таҷрибавии ташкилоти ҷамъиятии «Тухмипарвар» ва Пажӯҳишгоҳи физиологияи растаниҳо ва генетикаи АИ Ҷумҳурии Тоҷикистон, ки дар минтақаи Лахши ноҳияи Ҷиргатол дар баландии 2700 метр аз сатҳи баҳр ҷойгир аст, дурагакунии навъҳои гуногуни картошкаро анҷом доданд.               Ба олимон муяссар шуд, ки зиёда аз 2 ҳазор адад гулҳоро бо роҳи интихоби растаниҳои падарию модарӣ сунъӣ гардолуд (бордор) намоянд. Олимон боварӣ доранд, ки соли оянда ин тухмакҳои дурагавии (гибрид) — и картошкаро, ки дар шароити кӯҳистон ба даст оиадааст, боз аз нав зери озмоиш қарор диҳанд.               Бино ба гуфти олим Қурбоналӣ Партоев, тавассути чунин таҷриба дар Ҳиндустон аз як гектар 4 тонна тухмӣ ба даст оварда мешавад.               Боиси зикр аст, ки нархи 1 кг тухмакҳои ботаники картошка дар бозор аз 800 то 1000 доллари амрикоиро ташкил медиҳад.                Дар 1 га замин ба ҷои 3 тонна лундаҳои тухмӣ ҳамагӣ 100 — 150 грамм тухмаки биологии картошка истифода мешавад, ки он то 40 тонна ҳосил дода метавонад.