ДАР ХОРУҒ СОХТМОНИ ИНШООТИ ҶАШНӢ ТӮЛ МЕКАШАНД

                    Бадахшон, 7 август. (АМИТ «Ховар», Лутфишо Додо).-Дирӯз бо иштироки муовинони Раиси вилоят, кормандони дастгоҳи раиси вилоят, роҳбарони воҳидҳои сохтории мақомоти иҷроияи ҳокимияти давлатии Бадахшон ситоди назди раиси вилоят доир гардид, ки дар он масъала оиди «Рафти иҷрои қарори раиси вилоят», «Дар бораи тасдиқ намудани нақша-тадбирҳои мақомоти иҷроияи маҳаллии ҳокимияти давлатии вилоят бахшида ба таҷлили ҷашни умумиҷумҳуривии «Ваҳдати миллӣ дар шаҳри Хоруғ» мавриди муҳокима қарор гирифт.                    Роҳбари дастгоҳи раиси вилоят Хушқадам Хушқадамов иттилоъ дод, ки дар аксарият иншооти ҷашнӣ ҷараёни корҳои сохтмонӣ дар доираи лавҳа ва нақша хуб ба роҳ монда шудааст. Мутаассифона, дар қисми иншооти ҷашнӣ суръати кор ба талабот ҷавобгӯй набуда, баъзан ба кашолакорӣ роҳ дода мешавад. Алалхусус суръати сохтмони биноҳои прокуратура, раёсати корҳои дохила, ассотсисатсияи боркашонӣ, таҷдиди роҳҳо мақсаднок ба роҳ монда нашуда, аз 36 адад бунгоҳҳои тиббӣ, ки то рӯзи ҷашн бояд мавриди истифода қарор гиранд, сохтмони як қисматашон ҳанӯз оғоз нагардидааст.