ФУРУДГОҲИ ДУШАНБЕ ДАР НИМСОЛ 224 ҲАЗОР МУСОФИР ИНТИҚОЛ ДОДААСТ

                   Душанбе, 4 август. (АМИТ «Ховар», Жасмин Назарова). — Имрӯз дар корхонаи воҳиди давлатии (КВД) «Фурудгоҳи байналмилалии Душанбе» нишасти матбуотӣ баргузор шуд.                   Дар он фаъолияти нимсолаи якуми соли 2009 ҷамъбаст гардид. Нишасти матбуотиро Директори генералии КВД «Фурудгоҳи байналмилалии Душанбе» Рустам Холиқов ҷамъбаст намуда, иброз дошт, ки алҳол дар Тоҷикистон се ширкати ҳавопаймоӣ арзи ҳасти дорад. Тавассути ин се ширкати ҳавопаймоий Тоҷикистон — «Тоҷик -Эйр», «Сомон — Эйр» ва «Ист — Эйр» парвозҳо ба амал бароварда мешаванд.                    Фоидаи умумии фурӯдгоҳ дар нимсолаи аввали соли ҷорӣ беш аз 46,9 млн. сомониро ташкил дод.                    Боиси тазаккур аст, ки маблағгузории КВД «Фурӯдгоҳи байналмилалии Душанбе» ба буҷети давлатии Ҷумхурии Тоҷикистон дар нимсолаи аввали соли равон 13 млн. 805 ҳазору 97 сомониро ташкил дод.                    КВД «Фурӯдгоҳи байналмилалии Душанбе» дар моҳҳои январ — июни соли ҷорӣ беш аз 224 ҳазор нафар мусофиронро аз майдони фурӯдгоҳи Душанбе ба шаҳрҳои гуногуни Федератсияи Русия, Арабистони Саудӣ, Туркия давлати Олмон интиқол додааст.                     Ҳамчунин беш аз 1 130 тонна бор тавассути рейсҳои доимӣ ва чартерӣ аз Фурӯдгоҳи байналмилалии Душанбе дар ин муддат интиқол дода шудааст.