МИКРОАВТОБУС ОТАШ ГИРИФТ

                     Душанбе, 24 август. (АМИТ «Ховар», Таҳмина Ғоибназарова). — 19 август микроавтобуси мусофирбар, ки онро ронандаи 38 — сола Абдураҳмон Бобоев идора мекард, дар кӯчаи Сино ғайричашмдошт оташ гирифт. Дар натиҷаи тафтиши пешакӣ маълум шуд, ки сӯхтор бо гуноҳи ронанда сар задаст. Худи мошин дар натиҷа пурра сӯхта нобуд шуд. Мусофирони он осеб надидаанд. Айни ҳол сабабҳои рух додани оташ ва маблағи зарари он муайян карда мешаванд.                   22 август дар хоҷагии деҳқонии «Хум — 95» — и ҷамоати Навободи ноҳияи Турсунзода сӯхтор ба амал омад. Дар натиҷаи сӯхтор 35 гектар ғалла, 25 гектар алафзори хушк ва 15 гектар ҷавдор сӯхта нобуд шуд. Ҳаҷми умумии зарари сӯхтор 30 ҳазор сомониро ташкил медиҳад.                  Ҳафтаи гузашта дар ҷумҳурӣ 17 сӯхтор ба қайд гирифта шуд. Зарари умумии моддии онҳо 29 ҳазору 402 сомониро ташкил медиҳад.