СЕРТИФИКАТИ ҚОНУНИГАРДОНИРО СУД ЭЪТИРОФ НАКАРД

                   Душанбе, 27 август. (АМИТ «Ховар», Лаззат Диловарзод).- Бо қарори шаҳрдорӣ дар маҳаллаи «Буни Ҳисорак» Боғи миллӣ бунёд карда мешавад. Аммо бунёди боғ мушкилоти дигарро ба вуҷуд овард. Дар маҳали бунёди боғ 47 хоҷагӣ бо аҳли аёлашон, ки беш аз 200 нафар аҳолиро дар бар мегирад, зиндагӣ ба сар мебаранд ва дар ҳолати кӯчонидан онҳо бояд бо манзилҳои баробарарзиш таъмин шаванд.                   Ҳукумати шаҳр 33 хоҷагиро бо манзили зист ва замин барои сохтмон таъмин карда, 14 оила аз ин имтиёз бенасиб монд.                   Боиси тазаккур аст, ки ҳамаи 14 оила аз тарафи комиссияи қонунигардонии моликият дар ноҳияи Сино амволи худро қонунӣ гардонида соҳиби сертификат мебошанд.Суди ноҳияи Сино сертификати ҳамаи онҳоеро, ки бо даъво дар бораи кӯчонидан аз манзил муроҷиат кардаанд, беасос дониста,дар бораи вайрон кардани хонаҳои зисти онҳо бе додани замини баробарарзиш қарор қабул намуд.                  Раиси комиссияи қонунигардонии молу мулки ноҳия М. Носиров тасдиқ мекунад, ки сертификатҳои сокинони маҳаллаи «Буни Ҳисорак» асосҳои қонунӣ доранд, аммо суд метавонад эътироз орад.