СОХТМОНИ КӮПРУКИ НАВ ДАР АРАФАИ АНҶОМЁБИСТ

                       Рашт, 4 август. (АМИТ «Ховар», Ризвонов М.).- Сохтмони кӯпруки мошингузари деҳаи Янғолиқи ҷамоати деҳоти Ҷафр, ки баъди сохтмони он ба 16 ҳазор сокинони ҷамоатҳои Лангаришоҳ, Аскамон, Ҳиҷборак хизмат мерасонад, ҳанӯз дар солҳои шӯравӣ бо сабабҳои гуногун сохтмони он қатъ гардида буд. Соли 2008 бо дастгирии Президенти ҶТ Эмомалӣ Раҳмон сохтмони ин кӯпрук, ки кайҳо одамон мунтазири сохтмонаш буданд оғоз гардид. Кӯпрукро сохтмончиёни Маркази татбиқи лоиҳаҳои Вазорати нақлиёт ва коммунискатсияи ҶТ, Ҷамъияти саҳҳомии «Кӯпруксоз-32» ба ӯҳда доранд.                      Айни ҳол сохтмон бо муваффақият идома дошта, дарозии кӯпрук 226 метр, бараш 5 метру 90 сантиметр, борбардориаш 60 тоннаро ташкил медиҳад. Ҳоло 80 % кори сохтмону монтажкунии пул ба сомон расидааст. Сохтмончиён ният доранд, ки сохтмони пулро дар охирҳои моҳи августи соли равон анҷом дода, онро ҳамчун тӯҳфаи ҷашнӣ пешкаши сокинони деҳаҳои номбурда намоянд.