АНҶУМАНИ БОЗАРГОНОНИ ТОҶИКУ ҲИНД

                Душанбе, 1 сентябр.(АМИТ «Ховар», Марзия Саидова).- Анҷумани соҳибкорону тоҷирони Тоҷикистону Ҳиндустон аз 7 то 9 сентябри соли равон дар Душанбе зимни сафари нахустини расмии Президенти Ҳиндустон хонум Пратиб Девисинг Патил ба Тоҷикистон доир мегардад.                Аз Сафорати Ҳиндустон дар Душанбе ба АМИТ «Ховар» иттилоъ доданд, ки дар Анҷумани cоҳибкорон беш аз 40 нафар намояндагони доираҳои тиҷоратӣ ва ширкатҳои дорусозӣ, энергетикӣ, нақлиёт ва коммуникатсия, кишоварзӣ, нассоҷӣ, технологӣ ва дигар бахшҳои тиҷоратии Ҳиндустон иштирок менамоянд.                 Ҳадафи асосии Анҷумани бозаргонони тоҷику ҳинд тақвияти ҳамкориҳои мутақобилан судманди иқтисодию тиҷоратӣ байни Тоҷикистону Ҳиндустон аст. Дар назар аст, ки дар доираи баргузории ин Анҷуман вохӯрию мулоқоти доираҳои тиҷоратии Тоҷикистону Ҳиндустон, доир гардида, қарордодҳои ҳамкорӣ байни ширкатҳои ҳар ду кишвар ба имзо хоҳанд расид.