ФАРМОНИ ПРЕЗИДЕНТ ДАР АМАЛ

                 Душанбе, 30 сентябр. (АМИТ «Ховар», К.Эрлих).- Имрӯз маъракаи таъмин кардани оилаҳои камбизоат бо фурӯзонакҳои каммасраф ба поён мерасад. Дар ин бора ба мухбири АМИТ «Ховар» сардори шӯъбаи дахлдори Вазорати меҳнат ва ҳифзи иҷтимоии Ҷумҳурии Тоҷикистон Орифҷон Убайдов хабар дод.                  Маъракаи мазкур бо мақсади иҷрои Амри сарвари давлат Эмомалӣ Раҳмон «Дар бораи чораҳои иловагии сарфаи барқ» ва гузаштан аз лампаҳои пуршиддат ба фурӯзонакҳои каммасраф амалӣ карда мешавад. Мутобиқи фармони мазкур то моҳи октябри соли ҷорӣ 241 ҳазор оилаи камбизоат аз ҷониби Ҳукумати мамлакат бо фурӯзонакҳои каммасраф таъмин мегарданд.                «Чорабиниҳо вобаста ба таъмин кардани оилаҳои камбизоат бо фурӯзонакҳои каммасраф дар арафаи анҷомёбист. Охирин нуқтаҳои супоридани фурӯзонакҳо шаҳрҳои Исфараву Конибодоми вилояти Суғд ва ноҳияҳои Шӯрободу Мӯминободи вилояти Хатлон мебошанд. Субҳи имрӯз автомашинаҳо бо фурӯзонакҳои каммасраф вориди ин шаҳру ноҳияҳо шуданд», — хабар дод О.Убайдов                  Мутобиқи иттилои сарчашма, 1миллиону 928 ҳазор фурӯзонакҳои каммасраф ба 241 ҳазор оилаҳои мӯҳтоҷ тақдим карда шуд. Ҳар як оила бо 8 дона фурӯзонак таъмин гардид. Аз ин шумора вилояти Суғд бо 606 ҳазору 400 фурӯзонак барои 75 ҳазору 800 оила, вилояти мухтори кӯҳистони Бадахшон бо 52 ҳазор фурӯзонак барои 6,5 ҳазор оила, вилоятиХатлон бо 619 ҳазору 200 фурӯзонак барои 77 ҳазору 400 оила, шаҳри Душанбе бо 222 ҳазору 400 фурӯзонак барои 27 ҳазору 800 оила ва ноҳияҳои тобеи марказ бо 428 ҳазор фурӯзонак барои 53 ҳазору 500 оила таъмин карда шуданд.