ХАЛЪИ СИЛОҲИ ЯДРОӢ — РОҲИ ЯГОНАИ ТАЪМИНИ АМНИЯТИ ҶАҲОН !

                Ню — Йорк, 25 сентябр. (АМИТ «Ховар» — in.org.). – Таҳти раёсати Президенти ИМА Барак Обама маҷлиси махсуси Шӯрои амнияти СММ давом дорад. Дар он роҳбарон ва намояндагони давлатҳои ҷаҳон мавқеъ ва ақидаи худро дар бораи таъмини амнияти саросари ҷаҳон баён мекунанд. Дирӯз дар маҷлиси мазкур Муншии умумии СММ Пан Ги Мун сухан кард. Вай изҳор намуд, ки халъи силоҳи ядроӣ роҳи ягона ва дурусти таъмини амнияти саросари ҷаҳон мебошад.                Пан Ги Мун таъкид намуд: «То рӯзе, ки аслиҳаи қатли омм вуҷуд дорад, хавфи паҳн кардан, истифода бурдан, харидану фурӯхтан ё дуздидани он боқӣ хоҳад монд».                  Вай зикр намуд, ки имрӯз дар бисёр мамлакатҳо ҳазорон мил аслиҳаи ядроӣ дар ҳолати омодабош қарор дорад. Теъдоди торафт бештари мамлакатҳо кӯшиш мекунанд, ки ба чунин аслиҳаи марговар соҳиб шаванд. Дар саросари ҷаҳон озмоиши аслиҳаи ядроӣ давом дода мешавад. Бани башар ҳар рӯз дар ҳарос аст, ки террористон аслиҳаи ядроиро ба даст оварда, барои амалӣ гардондани ҳадафҳояшон истифода мебаранд. Қайд карда шуд, ки чунин хавфи бузургро танҳо бо роҳи якҷоя нобуд сохтани аслиҳаи ядроӣ бартараф кардан мумкин аст.                Муншии умумии СММ дар ин бобат кӯшишҳои маъмурияти ИМА ва Русияро мисол оварда, зикр намуд, ки давлатҳои дигар бояд ба онҳо пайравӣ кунанд.