ИСТИФОДАИ ЛАМПАҲОИ КАММАСРАФ – ИН САРФАЮ САРИШТАКОРИСТ

                Душанбе, 1 сентябр. (АМИТ «Ховар», Лаззат Диловарзод).- Баъди пахш ва нашри Паёми Президенти Ҷумҳурии Тоҷикистон ба Маҷлиси Олӣ ва ба тасвиб расидани Фармони Президент «Дар бораи тадбирҳои иловагии истифодаи сарфаҷӯёнаи энергия» аз 24 – уми апрели соли 2009 раванди ба истифодаи лампаҳои каммасраф гузаштани аҳолӣ ва корхонаву муассисаҳо оғоз ёфт.                — Истифодаи лампаҳои каммасрафи замонавӣ харҷи нерӯи барқро то 5 маротиба кам мекунад, илова бар ин, мӯҳлати кори онҳо 8 – 10 маротиба аз лампаҳои тафсон зиёд аст, омадааст дар Паёми Сарвари давлат Эмомалӣ Раҳмон ба Маҷлиси Олӣ, -иброз доштанд дар ширкати саҳҳомии холдинги «Барқи тоҷик» ба мухбири АМИТ «Ховар».                Бояд тазаккур дод, ки аввалин лампаҳои каммасраф, ки онҳо лампаҳои «люминестсентӣ» номида шудаанд, солҳои сиюм аз ҷониби ширкати маъруфи ИМА «Ҷенерал Электрикс» истеҳсол шуданд.                  Дар солҳои 70 – 80 –и асри гузашта бузургтарин ширкатҳои Аврупо ба истеҳсоли лампаҳои люминестсентӣ оғоз карданд, ки мақсад аз ба роҳ мондани истеҳсоли онҳо сарфаи нерӯи барқ дар истеҳсолот ва рӯзгори мардум дониста шуда буд, ки имрӯз низ он маънои худро гум накардааст.