ТАҶЛИЛИ РӮЗИ РӮДАКӢ ДАР ҚӮРҒОНТЕППА

                 Қӯрғонтеппа, 24 сентябр. (АМИТ «Ховар», Мурод Сотиев). – 22 сентябр дар маркази маъмурии вилояти Хатлон — шаҳри Қӯрғонтеппа ба муносибати Рӯзи Рӯдакӣ ҷамъомадҳои гуногун баргузор гардиданд.                 Яке аз ин ҷамъомадҳои идона дар гулгашти кӯчаи марказии Ваҳдат дар назди ҳайкали Абӯабдулло Рӯдакӣ баргузор гардид. Талабагони мактабҳои шаҳр аз эҷодиёти асосгузори адабиёти классикии форсизабонони ҷаҳон намунаҳо қироат карданд. Ҳунармандони театрҳои ба номи Ато Муҳаммадҷонови шаҳри Қӯрғонтеппа ва ба номи Саидалӣ Вализодаи шаҳри Кӯлоб бахшида ба ҳаёту эҷодиёти сипаҳсолори назми машриқзамин асари калони саҳнавиро пешкаши тамошобинон гардонданд. Сипас бо иштироки ҳунармандони шаҳри Қӯрғонтеппа ва ноҳияи Бохтар консерти калон намоиш дода шуд. Ҳамон рӯз дар маркази вилоят бахшида ба эҷодиёти А.Рӯдакӣ намоиш ва озмуни шиору плакатҳо ва иншои талабагон гузаронида шуд.