ТАВСИЯИ ЭКОЛОГҲО ДАР БОРАИ САРФАИ ЭНЕРГИЯ

                Душанбе, 16 сентябр. (АМИТ «Ховар», Людмила Дубинина). – Аъзои маҳфили созмонҳои экологии Тоҷикистон ба Вазорати энергетика ва саноати ҷумҳурӣ дар бобати амалӣ сохтани Барномаи давлатии сарфаи қувваи барқ ва мавриди истифода қарор додани манбаъҳои барқароршавандаи энергия дар давоми солҳои 2010 – 2015 силсилаи пешниҳодҳо ва тавсияҳо ба миён гузошт.                Роҳбари муассисаи «Замини хурд» Темур Идрисов зимни сӯҳбат бо мухбири АМИТ «Ховар» изҳор намуд, ки тадбирҳои афзун гардондани самараи истифодаи энергия бояд якҷоя бо манбаъҳои дигари барқароршавандаи он чӣ дар шаҳрҳо ва чӣ дар деҳот амалӣ гардонда шаванд. Ин муҳоҷирати аз ҳад зиёди аҳолиро аз деҳот ба шаҳрҳо пешгирӣ карда, шароити зиндагии одамонро беҳтар гардонда, бисёр проблемаҳои иҷтимоӣ ва экологиро ҳал менамояд. Агар барномаи мазкур бе назардошти мавқеи ҷонибҳои дигари манфиатдор тартиб дода шавад, дар ин маврид самараи дилхоҳ нахоҳад дод. Созмонҳои экологӣ тайёранд, ки дар бобати амалӣ сохтани барнома бо вазорату идораҳо ҳамкорӣ кунанд, гуфт Т.Идрисов.