ТОҶИКИСТОН БА МАЪРАКАИ БАРӮЙХАТГИРИИ АҲОЛӢ ОМОДА МЕГАРДАД

                 Душанбе, 14 сентябр. (АМИТ «Ховар», Бекназари Абӯбакр). — Мутоби Қарори Хукумати Ҷумҳурии Тоҷикистон соли 2010 дар қаламравӣ ҷумҳурӣ маъракаи барӯйхатгирии аҳолӣ ва фонди манзил гузаронида мешавад. Барӯйхатгирии аҳолӣ маъракаи муҳими сиёсӣ буда, гузаронидани он бо сабабҳои ба вуқӯъ омадани дигаргуниҳо дар ҷараёни демографӣ ва рушди иҷтимоӣ-иқтисодӣ, болоравии муҳоҷирати аҳолӣ, авҷ гирифтани проблемаҳои манзилӣ бениҳоят зарур мебошад.                 Бо мақсади ошноӣ пайдо намудан бо рафти омодагиҳо ба гузаронидани ин маърака Сарвазири Ҷумҳурии Тоҷикистон, Раиси Коммисияи давлатии мусоидати барӯйхатгирии аҳолӣ ва фонди манзили ҶТ Оқил Оқилов ба ВМКБ ва вилоятҳои Суғду Хатлон сафари корӣ анҷом дода, бо масъулини соҳа ҷаласаҳои махсус доир намуд. Дар ин ҷаласаҳо масоили ба рӯйхатгирии аҳолӣ ва фонди манзил, номгузории кӯчаҳо ва рақамгузории хонаҳо, тайёр намудани маводҳои харитавӣ ва амсоли инҳо баррасӣ шуда, ҷиҳати бартараф намудани баъзе камбудиҳои ҷойдошта ба масъулин супоришҳои мушаххас дода шуд.                 Мавриди зикр аст, ки Ҷумҳурии Тоҷикистон айни замон дар марҳилаи нави инкишофи иҷтимоӣ-иқтисодӣ қарор дорад ва донистани он, ки дар солҳои охир шумораи аҳолӣ то чӣ андоза афзудааст, ҳолати бозори меҳнат дар кадом сатҳ қарор дорад, равандҳои муҳоҷирати беруна ва дохилии мамлакат кадом равияро гирифтаанд басо муҳим аст.