ТОҶИКИСТОН – ИСЛОҲОТИ МУВАФФАҚ ДАР САМТИ СОҲИБКОРӢ

                Душанбе, 11 сентябр. (АМИТ «Ховар», Бекназари Абӯбакр). — Мувофиқи ҳисоботи солонаи Бонки ҷаҳонӣ Ҷумҳурии Тоҷикистон ба қатори 10 кишваре, ки дар самти беҳтар намудани фаъолияти соҳибкорӣ ислоҳоти ҷиддиро ба роҳ мондааст, шомил гардид.                  Дар ҳисобот омадааст, ки ислоҳоти бароҳмондаи Ҷумҳурии Тоҷикистон барои паст кардани таъсири манфии бӯҳрони иқтисодии ҷаҳонӣ ба соҳибкорон мусоидат намуда, он барои бартараф намудани мушкилиҳо дар давраи бӯҳрони иқтисодии ҷаҳонӣ, азнавсозӣ ва аз нав таъсис додани фаъолияти соҳибкории аз бӯҳрони иқтисодӣ зарардида, баланд бардоштани сифати фаъолияти соҳибкорӣ, ҳамчунин осон намудани раванди оғози фаъолияти соҳибкорӣ, ҳифзи ҳуқуқи соҳибкорону сармоягузорон ва моликияти онҳо, рушди муносибатҳои соҳибкории байнисарҳадӣ ва ғайра дар мамлакат равона гардидааст.                  Мавриди зикр аст, ки ислоҳот бештар ба кишварҳои аз ҷиҳати иқтисодӣ рушдкунанда таъсир расонда, кишварҳои ислоҳотгар асосан дар Аврупои Шарқӣ, Осиёи Марказӣ, Шарқи Миёна ва Африқои Шимолӣ фаъол будаанд. Соли равон ба зумраи 10 ислиҳотгари беҳтарин 4 ислоҳотгари нав, аз ҷумла Ҷумҳурии Тоҷикистон ва Аморати Муттаҳидаи Араб ворид гардиданд.