УСУЛИ НАВИ ТАЛОҚИ СУҒДӢ

                Душанбе, 23 сентябр. (АМИТ «Ховар», Лаззат Диловарзод).- Бино ба гуфти раиси Кумитаи кор бо занон ва оилаи назди мақомоти иҷроияи маҳаллии ҳокимияти давлатии вилояти Суғд Матлубахон Сатторова сокинони вилоят, ки дар хориҷ аз кишвар дар муҳоҷирати меҳнатӣ қарор доранд, баъди пайдо кардани ҳамсарони нав, ҳамсарони пешинаро тавассути телефонҳои мобилӣ талоқ медиҳанд, ки ин натанҳо хилофи қонун, балки хилофи хислатҳои неки инсонӣ ҳам мебошад.                  Муайян карда шудааст, ки яке аз роҳҳои ба худкушӣ даст задании занҳо дар вилоят ин хонавайронии оилаҳои ҷавон аз ҷониби ҳамсарони дар муҳоҷират хонадоршуда ва фиристонидани талоқ тавассути нома ва ё эълон доштан бо телефонҳои мобилӣ, инчунин дастгирии молиявӣ наёфтани ҳамсару фарзандон мебошад.                 Дар давоми соли ҷорӣ 69 нафар занон дар вилояти Сугд даст ба худкушӣ заданд, нисбати 7 ҳодиса парвандаи ҷиноӣ оғоз карда шудаст.