ДАР МАКТАБИ МИЁНАИ №8 СӮХТОР БА АМАЛ ОМАД

                 Душанбе, 27 октябр. (АМИТ «Ховар», Жасмин Назарова). – Ҳафтаи сипаришуда 26 ҳодисаи сӯхтор бо хисороти молии 62 ҳазору 745 сомонӣ ба қайд гирифта шуд. Масоҳати умумии сӯхторҳо 1 730 метри мураббаъ мебошад.                 Тавре ба АМИТ «Ховар» корманди дафтари матбуоти Сарраёсати хадамоти давлатии оташнишонии (ХДО) ВКД ҶТ майор Кароматулло Абдуллоев иттилоъ дод, чунин ҳодисаи сӯхтор рӯзи 17 октябр дар анбори мактаби таҳсилоти миёнаи рақами 8 ноҳияи Рушон ВМКБ, ки сарварии онро Азимшо Егибеков ба ӯҳда дорад, ба амал омад. Алангаи оташ дар масоҳати 18 метри мураббаъ анборро бо захираи 2 тонна ангиштсанг сӯхта нобуд кард. Дар натиҷаи гузаронидани амалиёти фаврии тактикӣ — оташнишонӣ паҳншавии сӯхтор пешгирӣ карда, он хомӯш карда шуд. Сабабҳои сӯхтор муайян карда мешаванд.                  Инчунин шаби 20 октябр дар таълимгоҳи компютерии ҶДММ «Азамат Ко», ки дар шаҳри Хуҷанд мебошад, сӯхтор ба амал омад. Ҳангоми сӯхтор дар масоҳати 2 метри мураббаъ кондисионер ва тирезаҳои таълимгоҳи мазкур корношоям гардиданд. Сабаби сӯхтор бе назорат гузоштани таҷҳизоти барқӣ аз тарафи муаллими таълимгоҳ Азамат Аъзамов мебошад. Мувофиқи ҳисобҳои пешакӣ зарари тахминӣ 500 сомонӣ мебошад.