КОНФРОНСИ МИЛЛӢ ДАР ДУШАНБЕ

                 Душанбе, 22 октябр. (АМИТ «Ховар», Фарангис Раҳимова). – Дирӯз дар меҳмонхонаи «Хаятт Редженси Душанбе» конфронси миллӣ таҳти унвони «Сатҳи зиндагӣ ва рушди инсон дар Тоҷикистон» баргузор гардид. Чорабинӣ бо ташаббуси Кумитаи давлатии омори Ҷумҳурии Тоҷикистон ва мусоидати Бонки ҷаҳонӣ ва ЮНИСЕФ гузаронида шуд. Дар кори конфронс зиёда аз 120 нафар намояндагони муассисаҳои давлатӣ, ташкилотҳои байналмиллалии хориҷӣ, созмонҳои ҷамъиятӣ ва ВАО иштирок карданд.                Дар рафти конфронс натиҷаи тадқиқот дар мавзӯи «Баҳогузорӣ ба хусусиятҳои камбизоатӣ дар Тоҷикистон — соли 2009» пешкаши мутахассисону коршиносон карда шуд. Дар конфронс намояндаи Бонки ҷаҳонӣ Олексий Ивашенко қайд кард: — «96 фоизи муҳоҷирони меҳнатии Тоҷикистон дар Федератсияи Русия қарор дошта 55 фоизи онҳо дар сохтмон ва 35 фоиз ба корҳои маошашон паст машғуланд. Авҷи сохтмонҳо дар Федератсияи Русия паст мешавад, бинобар ҳамин талабот ба коргарони хориҷӣ низ кам хоҳад шуд».               Тадқиқоти гузаронидашуда дар давоми солҳои 2003 – 2007 нишон медиҳад, ки сатҳи камбизоатӣ дар Ҷумҳурии Тоҷикистон аз 72 фоиз то ба 53, 5 фоиз поён рафт. Бо вуҷуди беҳбудии вазъият дар Ҷумҳурии Тоҷикистон ҳанӯз ҳам камбизоатӣ ва фақирӣ миёни аҳолӣ ҷой дорад.