ТАҶЛИЛИ 18 – СОЛАГИИ ИСТИҚЛОЛИЯТИ ҚАЗОҚИСТОН

                  Душанбе , 9 декабр. (АМИТ «Ховар», Наргис Бояхмедова). — Сафири фавқулодда ва мухтори Ҷумҳурии Қазоқистон дар Тоҷикистон Абӯтолиб Аҳмадов 8 декабр дар Душанбе зимни сӯҳбат бо журналистон хабар дод, ки 16 декабр 18 – солагии истиқлолияти Ҷумҳурии Қазоқистон ботантана ҷашн гирифта мешавад.                     А.Аҳмадов дар бораи тараққиёти иҷтимоию иқтисодии мамлакаташ сухан ронда, гуфт, ки ҳаҷми Маҳсулоти умумии дохилии ҷумҳурӣ дар давоми даҳ моҳи соли 2009 – ум 22,9 миллиард доллари ИМА – ро ташкил дод. Маблағи умумиии хариду фурӯши мол дар байни Қазоқистон ва мамлакаттҳои хориҷӣ дар ин муддат ба 50 миллиард доллари ИМА расид.                  Сафир баъдан дар бораи густариши муносибатҳои тиҷоратию иқтисодии Тоҷикистону Қазоқистон сухан ронда, зикр намуд, ки айни ҳол дар Тоҷикистон бо иштироки сармояи соҳибкорони қазоқ 47 корхонаи муштарак фаъолият дорад. Қайд карда шуд, ки ояндаи наздик дар шаҳри Душанбе Фонди муштараки сармоягузории Қазоқистону Тоҷикистон ба кор шурӯъ мекунад. Маблағи ибтидоии фонди мазкур сад миллион доллари ИМА мебошад. Маблағҳои фонд барои пешрафти соҳаҳои иқтисодиёту энергетика ва истихроҷи маъдан сарф карда мешавад.                   Дипломат зикр намуд, ки маблағи хариду фурии мол дар байни Тоҷикистону Қазоқистон соли 2008 – ум 300 миллион доллари ИМА ва то моҳи октябри соли 2009 – ум 228 миллион доллари ИМА – ро ташкил намуд.