ДОНИШҶӮЁНИ ХУҶАНДӢ ФАЪОЛОНА САҲМИЯ МЕХАРАНД

                 Суғд, 11 январ. (АМИТ «Ховар», Самад Юсуфӣ, Мирзалӣ Амонов).-Иқдоми созандаи Президенти Ҷумҳурии Тоҷикистон Ҷаноби Олӣ мӯҳтарам Эмомалӣ Раҳмон дар бобати саҳмгирӣ дар бунёди НБО–и Роғун аз ҷониби ҷомеаи меҳнатӣ ва мухассилини Донишгоҳи давлатии ҳуқук, бизнес ва сиёсати Тоҷикистон ҳамовозии гарму ҷӯшон пайдо намуд.                  Аҳли меҳнати донишгоҳ қатори аввалинҳо ҳануз 2–ноябри соли 2009 дар ҷаласаи гайринавбатии Шӯрои олимон масъалаи саҳмгирӣ дар бунёди НБО–и Роғунро мавриди баррасӣ қарор дода, ба суратҳисоби сохтмони муҳими аср 20000 сомонӣ музди меҳнати якрӯзаашонро интиқол дода буданд.                   Дар ҷавоби муроҷиатномаи Сарвари давлат ба мардуми шарифи Тоҷикистон, ки рӯзи 5 – уми январ аз тарики телевизион садо дод, имрӯз ҷомеаи меҳнатӣ ва мухассилин таҳти роҳбарии ректори донишгох, доктори илмҳои таърих, профессор Каримов О.К. дар хариди саҳмияҳои НБО –и Роғун муташаккилӣ зоҳир мекунанд. Дар ин бобат дар донишгоҳ ташаббусу иқдомҳои шоиста рӯи кор меоянд, ҳамагон бо дарки муҳимияти саҳмгирӣ дар ин кори нек бо амри дилу виҷдон дар хариди саҳмия иштирок мекунанд. Бояд тазаккур дод, ки худи сарвари донишгоҳ Осимҷон Каримов дар ин маърака пешсафи зоҳир намуда, ба маблаги 50.000 сомонӣ аз саҳмияҳои иншооти муҳими аср харидорӣ намуд. Маблағи саҳмияҳои харидаи мухассили факултаи Технологияи компютерӣ ва ҳисобгирӣ Наибулло Неъматов бошад, 11.000 сомониро ташкил дод.                    Рӯзи 8 – уми январ устодону мухассилини донишгоҳ ба таври оммавӣ ба нуқтаи фурӯши саҳмияҳо – Кохи ба номи А. Рӯдакии шаҳри Хуҷанд ҳозир шуда, дар ин кори наҷиб ҳар кадом ба қадри ҳиммату қудрат саҳм гирифтанд . Имрӯз маблағи саҳмияҳои харидаи аҳли донишгоҳ як миллион сомонӣ гузаштааст. Ҷомеаи устодону мухассилини донишгоҳ ният доранд, ки рӯзҳои наздик маблағи умумии хариди саҳмияҳоро боз ҳам афзун намоянд.