МУСОБИҚАИ БАЙНАЛХАЛҚИИ БОКС ДАР ҚИРҒИЗИСТОН

                 Душанбе, 25 январ. (АМИТ «Ховар», Пайрав Назаров). — Аз 27 то 31 январи соли равон дар пойтахти Ҷумҳурии Қирғизистон — шаҳри Бишкек барои поси хотири варзишгари машҳури қирғиз Дуйшенқул Шопоков мусобиқаи байналхалқӣ баргузор мегардад. Дар он аз ҷумҳуриҳои Ӯзбекистон, Қазоқистон, Муғулистон, Чин ва Тоҷикистон қариб 114 варзишгар иштирок менамояд. Дар мусобиқа танҳо аз Қирғизистон 130 нафар ширкат хоҳад варзид.                    Дар мусобиқаи мазкур намояндаи Тоҷикистон Меҳроҷиддин Каримов низ иштирок хоҳад кард, ки соли 2009 дар бисёр мусобиқаҳои минтақавию байналхалқӣ иштирок намуда, натиҷаҳои хуб ба даст овардааст. М.Каримов 17 сола буда, вазнаш 115 килограмм ва дарозии қадаш ду метру 18 сантиметр мебошад. Вай моҳи августи соли равон дар бозиҳои нахустини олимпии наврасон иштирок хоҳад кард, ки дар Сингапур баргузор мегарданд.