НИШАСТИ МАТБУОТӢ ДАР ВАЗОРАТИ НАҚЛИЁТУ АЛОҚА

                  Душанбе, 26 январ. (АМИТ «Ховар», Кристина Эрлих). — Имрӯз дар вазорати нақлиёт ва алоқаи ҷумҳурӣ бахшида ба натиҷаҳои фаъолияти вазорат ва муассисаҳои тобеи он дар соли 2009 ва нақшаҳои соли 2010 нишасти матбуотӣ баргузор гардид. Дар нишасти матбуотӣ вазири нақлиёт ва алоқаи ҷумҳурӣ Олимҷон Бобоев, роҳбарони раёсатҳо ва мутахассисони соҳавӣ ширкат варзиданд.                    Қайд карда шуд, ки соли 2009 ба воситаи ҳамаи навъҳои нақлиёт 19 миллиону 587 ҳазор тонна мол кашонда шуд. Ин нисбат ба соли 2008 – ум 101,9 фоиз зиёд мебошад. Ба воситаи нақлиёт дар соли гузашта 155 миллиону 344 ҳазор мусофир кашонда шуд, ки нисбат ба соли 2008 хеле зиёд мебошад. Соли гузашта танҳо ба воситаи нақлиёти автомобил 5 миллиону 39 ҳазор тонна мол ва 153 миллиону 904 ҳазор мусофир кашонда шуд.                     Соли 2009 ба воситаи нақлиёти ҳавоӣ 727 ҳазору 200 мусофир кашонда шудааст, ки нисбат ба соли 2008 – ум 18 фоиз зиёд аст.                      О.Бобоев фаъолияти хуби Корхонаи воҳиди давлатии «Почтаи тоҷик» — ро дар соли гузашта махсус таъкид намуд. Маблағи даромади корхона соли гузашта 600 ҳазор сомонӣ афзуд.                      Дар ҷараёни нишасти матбуотӣ ба зиёд гардидани воситаҳои нақлиёти автомобил дар мамлакат диққати махсус дода шуд. Зикр шуд, ки айни ҳол дар Тоҷикистон 320 ҳазор адад воситаи нақлиёти автомобил мавҷуд аст. Аз ин миқдор 46 ҳазор нақлиёти автомобил ба шаҳри Душанбе рост меояд.                        Айни ҳол масъалаи ҷорӣ намудани тартиби истифодаи воситаҳои нақлиёт дар пойтахти мамлакат ба миён омадааст. Вазир изҳор намуд, ки истифодаи воситаҳои кӯҳнаю фарсудашудаи нақлиёти ҷамъиятӣ дар пойтахт ояндаи наздик манъ карда хоҳад шуд. Ин воситаҳои нақлиёт баъди тармим карда шуданашон ба минтақаҳои дигар фиристода мешаванд.                          О.Бобоев изҳор намуд, ки айни ҳол тармиму таҷдиди роҳи мошингарди Душанбе – Ваҳдат шурӯъ шудааст. Инчунин ояндаи наздик сохтмони туннели «Лавари» оғоз меёбад, ки дарозии он 110 километр буда, Тоҷикистонро ба воситаи Афғонистон ба Покистон мепайвандад. Ҳоло дар бораи сохтмони туннели мазкур бо роҳбарони Афғонистон гуфтушунид карда мешавад, гуфт вазир.