ПАЛАТАИ ПОЁНИИ ПАРЛУМОН ЛОИҲАИ «CASA-1000»-РО БА ТАСВИБ РАСОНД

Душанбе, 21 январ.(АМИТ «Ховар», Марзия Саидова).-Палатаи поёнии парлумони Тоҷикистон –Маҷлиси намояндагон Созишномаи байни ҷумҳуриҳои Тоҷикистон, Афғонистон, Покистон ва Қирғизистон дар бораи таҳияи лоиҳаи сохтмони хати интиқоли барқи «CASA-1000»-ро ба тасвиб расонд.                    Зимни шарҳи масъалаи мазкур узви Кумитаи энергетика, саноат, сохтмон ва коммуникатсияи Маҷлиси намояндагон Садриддин Хайриддинов гуфт, ки тасвиби Созишномаи «CASA- 1000» қадами муассир буда, ҳамкориҳои иқтисодии Тоҷикистонро бо кишварҳои Осиёи Ҷанубӣ тақвият мебахшад. Мавсуф афзуд, ки барои татбиқи ин лоиҳа тақрибан 700 миллион доллар лозим аст.                    Тибқи Созишномаи «CASA-1000» хати интиқоли нерӯи барқ бо иқтидори 1000 мегаватт сохта шуда, тавассути он ҷумҳуриҳои Тоҷикистон ва Қирғизистон нерӯи барқи зиёдатии худро ба кишварҳои Афғонистон ва Покистон интиқол медиҳанд.                      Хати баландшиддати 1000-мегаватта 750 километр дарозӣ дошта, сохтмони он аз марзи Тоҷикистон оғоз гардида, то Афғонистону Покистон тӯл мекашад. Бонки ҷаҳонӣ, Бонки рушди Осиё ва Оҷонсии рушди байналмилалии Амрико тасмим гирифтаанд, ки барои амалӣ сохтани лоиҳаи мазкур сармоягузорӣ намоянд.                       Лоиҳаи «CASA-1000» бо назардошти сохтмони нерӯгоҳҳои барқи обии Тоҷикистон ба инобат гирифта шудааст. Дар мавриди татбиқи лоиҳаи мазкур Тоҷикистон ва Қирғизистон, ки дорои захираҳои бои обию энергетикианд, нерӯи барқро ба кишварҳои ниёзманд, ба мисли Афғонистон ва Покистон фурӯхта, иқтисоди кишварҳояшон баланд хоҳанд бардошт.