ФЕҲРАСТИ НАВИ ЁДГОРИҲОИ ТАЪРИХИЮ ФАРҲАНГӢ

Душанбе,  2 феврал. (АМИТ «Ховар», Таҳмина  Ғоибназарова). —  Мутахассисони  Вазорати  фарҳанги  ҷумҳурӣ  ба  таҳияи  феҳрасти  нави ёдгориҳои таърихию  фарҳангии  мамлакат  тайёрӣ  мебинанд. Сардори  раёсати   мероси  фарҳангӣ  ва  муҳофизати  ёдгориҳои таърихии  вазорат  Музаффар  Азизов  ба  мухбири  АМИТ «Ховар»  хабар  дод, ки ба  феҳрасти нав  бештар  аз  2000   ёдгории  таърихию  фарҳангӣ  дохил  карда  мешавад. Мо  бояд на танҳо ёдгориҳои таърихию  фарҳангиро  ба  қайд  гирем,  балки  маҳалли   муҳофизати  онҳоро  муайян  намуда,  ба  харитаи  истифодаи   замини  ноҳияҳо  дохил  карда,   муҳофизати  ёдгориҳоро  ба  зиммаи  мақомоти  маҳаллӣ  гузорем,  гуфт  М.Азизов.   Қайд  карда  шуд, ки  қабл  аз  ин  феҳрасти  пештараи  ёдгориҳои таърихию  фарҳангӣ  соли  1972   тартиб дода шуда буд. Дар  давоми 15  соли  охир  дар  Тоҷикистон   дар натиҷаи  ғайриқонунӣ  аз  худ  кардани  қитъаҳои  замин   зиёда  аз  100 ёдгории  таърихию  фарҳангӣ, аз  ҷумла  шаҳристонҳои  қадима,  қалъаҳо  ва  қабристонҳо несту  нобуд  карда шуданд. Айни  ҳол   дар  маҳалли ёдгориҳои  таърихию  фарҳангӣ  биноҳои  гуногун  сохта  мешаванд. Аз  ин  рӯ  хеле  муҳим  аст, ки  масъалаи  ба  ихтиёри  муассисаҳои  фарҳангӣ  супоридани ёдгориҳои таърихию  фарҳангӣ  ҳал  карда  шавад.  Танҳо  дар  ҳамин  маврид  ин  ёдгориҳо  аз  дахолати  инсон  муҳофизат  карда,  барои наслҳои оянда  нигоҳ  дошта  мешаванд,  гуфт  Музаффар  Азизов.