БЕҲТАРИН ИХТИРОЪКОР СОҲИБИ 3000 СОМОНӢ МЕГАРДАД

Душанбе, 13 апрел. (АМИТ «Ховар», Лутфия Эшонқулова).- Бахшида ба соли «Маориф ва фарҳанги техникӣ», Саридораи геологияи назди Ҳукумати Ҷумҳурии Тоҷикистон барои ихтироъ ва навиовариҳои беҳтарин  дар соҳаи геология озмун эълон карда, барои ихтироъ – 3000 сомонӣ ва навоварӣ ҷойҳои 1, 2, 3-юм мукофотҳои пулӣ таъин кардааст. Озмун як сол идома ёфта,  соли 2011 ҷамъбаст мегардад. Ҳамчунин, саридораи мазкур, бо дастуру ҷонибдории Президенти кишвар барои 5 донишҷӯи фаъоли Донишгоҳи миллии Тоҷикистон, Донишгоҳи давлатии Хоруғ ва Донишкадаи кӯҳии металлургии шаҳри Чкаловск стипендияи соҳавии «Ганҷи умед» таъсис дод, ки ҳаҷми он 100 сомониро ташкил медиҳад. Дар нишасти матбуотӣ зикр гардид, ки стипендияи мазкур шурӯъ аз имсол ба  донишҷӯёни фаъол дода мешавад.