МАҶЛИСИ САЙЁРИ ШӮРОИ ҲАМОҲАНГСОЗ

Душанбе,  13 апрел. (АМИТ «Ховар»,  Наталя  Михайлова). —  Дар  шаҳри  Қӯрғонтеппа  маҷлиси  сайёри  Шӯрои  ҳамоҳангсози  тадбирҳои  мубориба ба  муқобили  истеъмоли   маводи  нашъадор  баргузор  гардид.  Дар он  роҳбарону  намояндагони  вазоратҳои тандурустӣ,  маориф,  меҳнат  ва  ҳифзи  иҷтимоии  аҳолӣ,  молия,  фарҳанг,   кумитаҳои  ҷавонон,  варзиш ва  сайёҳӣ,  телевизион  ва радио,  занон  ва  оила  ширкат  варзиданд. Маҷлис  таҳти  раёсати   муовини  Сарвазири  ҷумҳурӣ,   раиси  Шӯрои  ҳамоҳангсоз  Руқия  Қурбонова  гузашт. Иштирокчиёни маҷлис ҳисоботи роҳбарияти  Шӯрои  ҳамоҳангсозро  дар  мавзӯи  пешгирии   истеъмоли  аз  хад  зиёди  маводи  нашъадор  дар  вилояти  Хатлон  ва  натиҷаҳои тафтиши  аввали  моҳи  марти  соли равон  гузаронидашуда шунида  ва  муҳокима  карданд. Қайд  карда шуд, ки  дар  вилоят   шумораи   духтурони  соҳавӣ   кам  буда,   маҷлисҳои  Шӯрои  ҳамоҳангсоз  номунтазам  гузаронида ва  мақомоти  давлатӣ  дар  бобати  пешгирии   нашъамандӣ  бо  корхонаю  муассисаҳо мувофиқи талаб  ҳамкорӣ  намекунанд.  Зикр  шуд, ки  айни  ҳол  дар  вилояти  Хатлон  1398  нашъаманд  ба  қайд  гирифта  шудааст. Аз ин  ҷумла 34  нафар  занон  мебошанд. Дар  маҷлис  ба  мақомоти  дахлдори  вилоят  тавсия  дода шуд, ки  ташвиқу тарғиби тарзи  ҳаёти  солимро  дар байни  аҳолӣ  пурзӯр  намояд.