НИШАСТИ МАТБУОТИИ РАИСИ ШАҲРИ ЧКАЛОВСК

Чкаловск,  14 апрел. (АМИТ «Ховар», Санавбар  Мақсудова). —  Раиси шаҳри  Чкаловск  Шавкат  Бобоев  дирӯз  зимни  нишасти  матбуотӣ  хабар  дод,  ки  то  аввали  моҳи  апрели  соли  равон  маблағи  қарзи  корхонаю  муассисаҳои  шаҳр  аз  ҳисоби  напардохтани  андоз  3  миллиону  871,6 ҳазор  сомониро  ташкил  дод. Ин  нисбат ба  давраи  то  1  январи  соли равон  1  миллиону  129,8 ҳазор  сомонӣ  зиёд  мебошад.  Яке  аз корхонаҳои  калонтарини  қарздор Мудирияти  канали  Хоҷабоқирғон  ба  шумор  меравад. Бо  вуҷуди  ин нақшаи  қисми  даромади  буҷети  шаҳр  105,5  фоиз иҷро  карда шуд. Ш.Бобоев   зикр  намуд, ки имрӯз  дар  шаҳр 2428  нафақахӯр  зиндагӣ  мекунад.  Онҳо  ба  ҳисоби  миёна  ҳар  моҳ  117,4  сомонӣ  нафақа  мегиранд.  Барои додани  нафақа  дар  се  моҳи  аввали  соли  равон  723,6  ҳазор  сомонӣ  лозим  буд,  вале  дар  амал  561,7  ҳазор  сомонӣ  ҷудо  карда шуду  халос. Музди  миёнаи  кори  ҳармоҳа  дар  шаҳри  Чкаловск  235  сомонӣ  мебошад,  ин   нисбат  ба  ҳамин  давраи  соли  2009 – ум 13  фоиз  зиёд  аст. То  имрӯз  аз  ҳисоби  надодани   музди  кору  маош  маблағи  карз  61,6 ҳазор  сомониро ташкил  медиҳад. Дар  давоми  се  моҳи  гузашта  дар  шаҳри  Чкаловск  46 ақди  никоҳ, 52  вафоти одамон  ба  қайд  гирифта шуд ва  125  кӯдак  ба  дунё  омад. Қайд  карда  шуд, ки  дар ин  муддат  дар  шаҳри  Чкаловск  39   ҷиноят  ба  қайд  гирифта  шуд.  Вақтҳои  охир  шумораи  баъзе  навъҳои  ҷиноят, аз  ҷумла авбошию  қаллобӣ  кам  шуда,  дар  баробари  ин  миқдори   куштори  бадқасдона,  ҷиноятҳои  муташаккилона, дуздӣ,  ғоратгарӣ,  порахӯрӣ  ва ҷинояти ноболиғон  то  андозае  бештар  гардидаанд. Ш.Бобоев   афзуд, ки   сабаби  зиёд  гардидани  ҷиноятҳои  вазнин  аз минтақаҳои  дигари  мамлакат  ба  шаҳри  Чкаловск  омадани  теъдоди  зиёди одамон  мебошад.  Танҳо  дар  соли  2009  аз  минтақаҳои  дигари  мамлакат  дар шаҳри  Чкаловск  қариб  6  ҳазор  нафар  ба  қайд  гирифта  шудааст, гуфт  вай.