СОЛИ 2010 СОЛИ БАРТАРАФ КАРДАНИ БӮҲРОН

Душанбе, 28 апрел. (АМИТ «Ховар», Лаззат Диловарзод).-  Соли ҷорӣ барои иқтисодиёти кишвари мо соли бартараф кардани таъсири бӯҳрони молиявӣ мебошад. Дар натиҷаи татбиқи нақшаи чорабиниҳои зиддибӯҳронии Ҳукумати Ҷумҳурии Тоҷикистон, соли 2009 ҳаҷми воқеии маҷмӯи маҳсулоти дохилӣ (ММД) нисбат ба соли 2008 сеюним фоиз афзуд. Таваррум дар сатҳи 5 фоиз нигоҳ дошта шуд, ки нисбат ба ҳамин давраи соли гузашта 7 фоиз камтар  аст. Дар давраи бӯҳрон зарари он ба буҷаи ҷумҳурӣ ба зиёда аз 1 млрд. сомонӣ баробар гардид. Натиҷаҳои семоҳаи аввали соли 2010 аломатҳои беҳтар гардидани вазъи иқтисодии мамлакатро нишон медиҳанд. Дар ин давра маҷмӯи маҳсулоти дохилӣ (ММД) 6,7 фоиз афзуд, ки назар ба моҳҳои январ – марти соли 2009 3,2 фоиз зиёд аст. Ҳаҷми маҳсулоти саноатӣ бошад 16,3 фоиз афзудааст,- иброз доштанд дар Вазорати рушди иқтисод ва савдои ҷумҳурӣ ба мухбири АМИТ «Ховар».