ҲАДАФИ АФЗАЛИЯТНОКИ СИЁСАТИ ДАВЛАТ- ЗИНДАГИИ ШОИСТА

Душанбе, 13 май. (АМИТ «Ховар», Лаззат Диловарзод).- Ҳукумати ҷумҳурӣ бо мақсади ҳалли проблемаю мушкилоти соҳаҳои иҷтимоии сокинони ҷумҳурӣ эътибори ҷиддӣ медиҳад. Сарфи назар аз таъсири бӯҳрони молиявӣ маблағгузорӣ барои рушди иҷтимоӣ ҳамасола зиёд карда мешавад. Боис ба ёдоварист, ки соли гузашта буҷети давлатӣ барои аксари соҳаҳо ба андозаи даҳфоизӣ кам карда шуд, аммо маблағгузории хароҷоти соҳаи иҷтимоӣ дар доираи буҷети тасдиқшуда пурра таъмин гардид. Дар соли ҷорӣ лоиҳаи буҷети ҷумҳурӣ ба ду қисм: а) буҷети иҷтимоӣ б) буҷети тараққиёт ҷудо карда шудааст. Дар баробари ин, маблағҳои зиёди иловагӣ, аз ҷумла зиёда аз 80 фоизи Фонди эҳтиётии Президент, фонди хароҷоти Ҳукумати ҷумҳурӣ, захираҳои  молиявӣ, маблағҳои инвеститсионӣ ва грантҳо ба рушди иҷтимоӣ бахшида мешаванд, ки зиндагии шоистаи мардумро таъмин мекунад,- иброз доштанд дар Вазорати рушди иқтисод ва савдо ба мухбири АМИТ «Ховар».