2 МЛН. ДОЛЛАР КӮМАКИ ТЕХНИКӢ

Душанбе, 31 май. (АМИТ «Ховар», Лаззат Диловарзод).- Нақшаи чорабиниҳо оид ба татбиқи сохтори нави    «равзанаи ягона» тасдиқ ва қабул гардид. Дар ин бора аз Раёсати сиёсати савдои хориҷии Вазорати рушди иқтисод ва савдо ба мухбири АМИТ «Ховар» иттилоъ доданд. Бино ба гуфти Л. Кислякова дар марҳилаи аввал дастуруламал дар бораи Шӯрои мутобиқат тартиб дода шуда, Корхонаи воҳиди давлатӣ оид ба татбиқи «равзанаи ягона» дар назди низоми гумрукӣ таъсис дода мешавад. Шӯрои мутобиқат аз болои Корхонаи воҳиди давлатӣ назорат мебарад. Тибқи дастуруламал, ба  Шӯрои мутобиқат намояндагони ҳамаи вазорат ва идораҳое, ки дар татбиқи лоиҳа  ҳуҷҷатҳои лозимаро оид ба амалиёт ба содироту воридот пешниҳод намудаанд, дохил мегарданд. Дар баробари ин, ба шӯрои мазкур намояндагии Иттиҳоди Аврупо чун донор дохил гардида, лоиҳаро аз ҷиҳати техникӣ  дастгирӣ менамояд. Аз рӯи баҳои пешакӣ, Иттиҳоди Аврупо барои дастгирии техникии лоиҳаи «равзанаи ягона» 2 млн. доллар ҷудо менамояд.