АСАРҲОИ ШОИРОНИ ШАРҚУ ҒАРБ ДАР МАҶАЛЛАИ НАВ

Душанбе, 27 май. (АМИТ «Ховар», Лутфия Эшонқулова).- Шумораи аввалини маҷаллаи адабӣ-бадеии «Шарқу ғарб», ки муассисаш Академияи мусаввири Тоҷикистон мебошад, бо ташаббуси зумраи адибони тоҷик аз чоп баромад. Дар шумораи нахустини он осори шоирону нависандагон, адибону мусаввирони хориҷиву ватанӣ  рўи чоп омаданд. Аз ҷумла, зери рубрикаҳои «100 ҳикояи асри ХХ адабиёти тоҷик», «100 китоби бузург», «Тарҷумаҳои нав», «100 мусаввараи бузург», «Ҳикояҳои адибони ҷаҳон» ва «100 нависандаи бузург» ҳикояву асарҳо ва шеърҳои офаридаи адибону шоирони кишварҳои Русия, Қирғизистон, Қазоқистон, Амрико, Хитой,  Ҳиндустон, Германия, Эрон, Австралия, Белорус манзури хонанда гардидааст.  Маҷалла имкон медиҳад, ки хонанда аз осори бузурги эҷодкорони ғарбу шарқ огоҳӣ пайдо намояд.  Ба қавли сардабири маҷалла Абдуғаффори Абдуҷаббор, нашри маҷаллаи нав як риштае хоҳад буд, баҳри пайванди тоҷикистониён бо ҷомеаи ҷаҳонӣ ва дар баланд бардоштани маънавиёти ҷомеа низ мусоидат хоҳад кард.