КӮМАКИ СММ БАРОИ ПЕШРАФТИ СОҲАИ КИШОВАРЗӢ

Душанбе,  29 май. (АМИТ «Ховар», Наталя  Михайлова). —  Вазири  кишоварзии  Тоҷикистон  Қосим  Қосимов  27  май  дар  Душанбе  бо  ҳайати  Фонди  байналмилалии   рушди   соҳаи  кишоварзӣ  таҳти  роҳбарии  Малеҳ  Ҳамид  Ҳусейн  мулоқот  кард. М.Ҳамид  ба  вазир  хабар  дод, ки барномаи  рушди  соҳаи   чорводорӣ  ва  истифодаи  чарогоҳҳои  Тоҷикистон   дар  фонди  мазкур  умуман   дастгирӣ  карда шуд ва  барои  амалӣ  сохтани он  18  миллион   доллари  ИМА  ҷудо  карда  мешавад. Ҳадафи  барнома   зиёд  кардани  ҳосилнокии  соҳаи  кишоварзӣ,  таъмини  амнияти  озуқаворӣ  ва  паст  гардонидани  сатҳи  камбизоатӣ  дар  12  ҳазор   хоҷагии  шахсӣ  мебошад. Вазири  кишоварзии  Тоҷикистон  Қосим  Қосимов  зикр  кард,  ки  соҳаи  чорводорӣ  ва  хусусан   соҳаи  зотпарварии  мамлакат   дар  давоми  солҳои охир  тақрибан  барҳам  хӯрдааст. Вале  ин  соҳа  барои  беҳтар  сохтани  зиндагии  аҳолӣ   ва  иҷрои  барномаи  амнияти  озуқавории  мамлакат   кӯмаки  калон  расонда  метавонад. Зимни  мулоқот   зарурати   омода  сохтани   заминаи  қонунгузорӣ  барои рушди   соҳаи  чорводорӣ  махсус  таъкид  карда шуд. Вазир   қайд  намуд, ки барномаи  СММ  барои барқарор  сохтани  соҳа  ва  беҳтар  намудани  шароити  зиндагии  мардум  дар  минтақаҳои  алоҳида  нақши  муҳим  бозида  метавонад. Вазорати  кишоварзӣ  айни  ҳол  ба  таҳияи  лоиҳаи   барномаи  ислоҳоти   соҳа машғул  мебошад. Вазир   супориш  дод, ки   фаъолияти  муштараки  гурӯҳи  кории  СММ – ро   бо ташкилотҳои  маҳаллӣ ба  кор  монда, имкониятҳои   ноҳияҳои  вилояти  Хатлон  омӯхта шавад, ки  барнома  дар онҳо   амалӣ  карда  хоҳад  шуд. Фонди  байналмилалии   рушди  соҳаи   кишоварзии  СММ  яке  аз  муассисаҳои  он  буда,  соли  1977 ташкил  ёфтааст. Фонди  мазкур  ба  мамлакатҳои  камбизоату  қафомонда,  барои беҳтар  сохтани  вазъияти  соҳаи  кишоварзӣ  кӯмак  мерасонад.