САБАБИ СЕ БАРОБАР ҚИМАТ ШУДАНИ НАРХИ САБЗӢ МУАММОСТ

Душанбе, 12 май. (АМИТ «Ховар», Лаззат Диловарзод).-  Онҳое, ки ҳаррӯза   аз дӯконҳои   шаҳри Душанбе маводи ғизоӣ, аз қабили пиёз, картошка, карам, гӯшт ва боз даҳҳо маҳсулоти кишоварзиро харидорӣ мекунанд, якбора аз се баробар зиёд шудани нархи сабзӣ  дар ҳайрат монданд. Аввалан боло бурдани нархи маҳсулоти кишоварзӣ дар фасли баҳор дар саросари ҷумҳурӣ ба ҳукми анъана даромадааст ва ҳама бозорнишинон андешаи онро  мекунанд, ки захираҳои   тирамоҳии мардум дар моҳҳои март- апрел кам мегардад ва давраи ба даст овардани маблағи бедарди миёни   онҳо  оғоз меёбад. Аз ин рӯ онҳо ҳамаи маҳсулоти дар фасли баҳор вориди бозоршударо бо ҳар роҳ ба даст оварда, нархи стихиявии бозорро ба вуҷуд меоранд ва ба назар чунин мерасад, ки кори онҳо фармоишист ва баробари нафъи худ ба нафъи каси дигар низ кор мекунанд, ки нозиронашон инро нодида мегиранд. Боиси зикр аст, ки дар давоми соли 2009 ва чор моҳи соли 2010  арзонтарин маводи кишоварзӣ сабзӣ ҳисоб меёфт, ки нархи он аз 50 дирам зиёд  набуд ва чӣ шуд, ки дар моҳи май нархи он якбора чор  баробар                (2 сомонӣ) боло рафт. Масъулинро зарур аст, ки сабабҳои болоравии нархро  омӯхта, барои паст кардани он чораҳо андешанд.