МУЛОҚОТИ Н. БОРДЮЖА БО НАМОЯНДАГОНИ ҚИРҒИЗИСТОН

Маскав,  23 июн. (АМИТ «Ховар»,  Ҳалима  Хушқадамова). —  Муншии  умумии Созмони   аҳдномаи  амнияти дастаҷамъӣ  Николай  Бордюжа  дар  шаҳри  Маскав  бо  котиби  Шӯрои  амнияти  Ҷумҳурии  Қирғизистон Алик  Орозов  ва  иҷрокунандаи  вазифаи   вазири  корҳои  хориҷии  ин  мамлакат  Руслан  Қазоқбоев  мулоқот  кард. Зимни  мулоқот  вазъияти  имрӯзаи  Қирғизистон  муҳокима  карда шуд.  Мусоҳибон  изҳор  карданд, ки  вазъияти  қисмати  ҷанубии  ҷумҳурӣ  то  ҳол  мураккаб, ноором ва  муташанниҷ  мебошад.  То  ҳол  хавфи  рух додани  бетартибиҳо   аз  байн  нарафтааст,  вале   миқдори  бетартибиҳои  оммавӣ  ва  муноқишаҳо  торафт   кам  мешавад.   Мақомоти  интизомӣ  вазъиятро  тадриҷан  таҳти назорат  мегиранд.  Ба  ин,  аз  ҷумла,  сиёсати  оқилонаю  дурандешонаи   ҳукумат  ва  мақомоти  Ӯзбекистони  ҳамсоя  мусоидат  мекунад. Дар  робита   масъалаи   расонидани  кӯмак ба   аҳолӣ  ва  мақомоти   муҳофизи  қонуну  тартиботи  Қирғизистон  аз тарафи  давлатҳои  аъзои  СААД  ба  миён  меояд. Мо  ба  Қирғизистон  чунин  кӯмакро  ҳатман  мерасонем,  гуфт  Н.Бордюжа. Зимни  мулоқот  ба  амалӣ  сохтани   тадбирҳои  дастаҷамъии  мӯътадил  гардонидани  вазъият  диққати  махсус  дода шуд.  Бояд  гуфт, ки  ин  масъаларо   котибони   шӯроҳои  амнияти  давлатҳои  аъзои  созмон  14  июн   муҳокима  намуда,  тавсияҳояшонро   барои   қабули  қарор  ба  сарони  давлатҳо  пешниҳод  карда буданд. Муншии  умумии  созмон изҳор  намуд, ки   ҳамроҳи  Созмони  байналмилалии  муҳоҷират  ва  Кумитаи  байналмилалии  Салиби  Сурх   масъалаи  расонидани  кӯмаки  башардӯстона  ба  аҳолии   қисмати  ҷанубии  Қирғизистон  ва  гурезаҳои  қирғиз  дар  Ӯзбекистон  баррасӣ  карда  мешавад.