ТАВАҶҶӮҲИ ДИПЛОМАТИ ГУРҶИСТОНӢ БА ТАЪРИХИ ПАНҶАКЕНТ

 Душанбе, 23 август. (АМИТ «Ховар», Бекназари Абӯбакр). — Сафири фавқулодда ва мухтори Ҷумҳурии Гурҷистон дар ҷумҳуриҳои Тоҷикистон ва Ӯзбекистон Кублашвили Георгий ҷиҳати шиносоӣ бо вазъи иҷтимоӣ ва мавзеъҳои таърихӣ ба шаҳри бостонии Панҷакент ташриф оварда, аз мактаби таҳсилоти миёнаи умумии рақами 71-и шаҳр ва вазъи сохтмони мактаби навбунёди шаҳраки Шӯрча дидан кард. Зимни боздид иттилоъ дода шуд, ки мактаби навбунёд дорои 6 синфхона буда, дар он 144 нафар хонандагон таҳсил мекунанд. Маблағи сохтмон 768.800 сомониро ташкил дода, қисми асосии корҳоро тариқи ҳашар ба ҷо оварда истодаанд. То охири моҳи октябри соли равон бинои асосии таълимгоҳ қомат рост мекунад. Дипломати гурҷистонӣ ҳамчунин аз мавзеи Қайнаҳр, шаҳраки давраи асримиёнагӣ, ки ба садаҳои V-VIII тааллуқ дорад, осорхонаи кишваршиносии ба номи Абӯабдуллоҳ Рӯдакӣ ва мавзеи бостонии Саразм дидан кард. Мавриди зикр аст, ки дар тӯли 1500 соли мавҷудияташ шаҳри Саразм ҳамчун яке аз шаҳракҳои қадимтарини Осиёи Миёна дар ташаккулёбӣ ва рушди фарҳанги ориёӣ нақши бузург бозидааст.