Э. РАҲМОН: «ТАТБИҚИ СМР-ШАҲОДАТИ РУШДИ ВАЗЪИ ИҚТИСОДӢ ДАР ҶТ»

Душанбе, 21 сентябр. (АМИТ «Ховар», Бекназари Абӯбакр). – «Мо аз аввалинҳо шуда бо кўмаки Созмони Милал арзёбии фарогири эҳтиёҷоти кишварро гузаронидем. Аз рўи он Тоҷикистон дар тўли даҳ соли оянда ҷиҳати таъмини пешрафти зарурӣ дар амалӣ намудани Ҳадафҳои Рушди Ҳазорсола (ҲРҲ) ба 13 милиард доллари амрикоӣ ниёз дорад», — тазаккур дод Президенти Ҷумҳурии Тоҷикистон Эмомалӣ Раҳмон дар маросими муаррифии «Ҳадафҳои Ҳазорсола: дастовардҳои Тоҷикистон», 20 сентябр дар шаҳри Ню-Йорк. Эмомалӣ Раҳмон зикр намуд, ки дар асоси ин эҳтиёҷот Стратегияи миллии рушд барои солҳо 2006-2015 ва Стратегияҳои паст намудани сатҳи камбизоатӣ барои солҳои 2006-2008 ва 2010-2012 таҳия шуданд. Стратегияи миллии рушди Ҷумҳурии Тоҷикистон, ки бо иштироки бевоситаи Созмони Милал омода гардид ва декабри соли 2005 дар қароргоҳи Созмони Милал муаррифӣ шуд, муносибати усулан наверо нисбат ба таъмини рушд таҷассум кардааст. Он таҷрибаи ҷаҳонии таҳия ва татбиқи чунин санадҳои стратегӣ, дарсу натиҷаҳои марҳалаҳои гузаштаи тараққии кишвар, инчунин воқеияти вуҷуддоштаву дурнамои инкишофро ба назар гирифтааст. Ин санадҳо, қабл аз ҳама, ба таъмини рушди босуботи иқтисод ва боло бурдани сатҳу сифати зиндагии мардум нигаронида шудаанд. Маврид ба зикр аст, ки татбиқи Стратегияи миллии рушд дар бораи беҳтар шудани вазъи иқтисодӣ дар кишвар шаҳодат медиҳад. Масалан, сарфи назар аз бўҳрони иқтисодиву молиявии ҷаҳон тамоюли афзоиши Маҷмўи Маҳсулоти Дохилӣ ба назар расида, дар нимаи аввали соли 2010 ин афзоиш 7,4 фоизро ташкил додааст. Ҳаҷми истеҳсоли маҳсулоти саноатӣ 12 фоиз ва маҳсулоти кишоварзӣ 9,2 фоиз зиёд шудааст. Тамоюлҳои мусбии ҳаҷми савдои чакана (12 фоиз) ва хидматҳои пулакӣ (15,1 фоиз) вуҷуд дошта, дар бозори истеъмолӣ сатҳи таваррум 2,8 фоизро ташкил додааст.