ИТАЛИЯ ДАР ТАТБИҚИ ЛОИҲАҲОИ ЭНЕРГЕТИКИИ ТОҶИКИСТОН ШИРКАТ МЕКУНАД

Душанбе, 13 сентябр. (АМИТ «Ховар», Бекназари Абӯбакр). — Имрӯз дар шаҳри Душанбе миёни Вазорати рушди иқтисод ва савдои Ҷумҳурии Тоҷикистон ва Вазорати рушди иқтисоди Италия Эъломияи муштарак оид ба созмон додани Форуми машварати байни Ҷумҳурии Тоҷикистон ва Ҷумҳурии Италия оид ба ҳамкориҳои иқтисодӣ, саноатӣ ва молиявӣ ба имзо расид. Эъломияи мазкурро муовини вазири рушди иқтисод ва  савдои Тоҷикистон Саидаҳмад Назриев ва муовини вазири рушди иқтисоди Италия Адолфо Урсо имзо карданд.  Ёдовар мешавем, ки бо мақсади густариши муносибатҳои тиҷоративу иқтисодии байни Ҳукумати Тоҷикистон ва Ҳукумати Италия 13 сентябр ҳайати расмии Италия ба Душанбе ташриф овард. Дар ҷараёни сафар ҳайати Ҷумҳурии Италия бо роҳбарони вазоратҳои корҳои хориҷӣ, рушди иқтисод ва савдо, энергетика ва саноат, нақлиёт ва коммуникатсия ва дар Палатаи савдо ва саноат бо соҳибкорони Тоҷикистон мулоқот намуд. Ҳайати Италия ҷониби Тоҷикистонро бо дастовардҳои иқтисодии худ шинос намуда, масъалаҳои ҳамкории дуҷонибаро дар соҳаҳои фаъолияти истеҳсолӣ, савдои байналмилалӣ ва коммуникатсия муҳокима намуд. Тарафҳо имкониятҳои густариши ҳамкории дуҷонибаро дар соҳаи энергетика ва саноат, бахусус иштироки сармоягузорони итолиёвиро дар лоиҳаҳои энергетикӣ, ташкили истеҳсолоти муштараки коркарди маҳсулоти кишоварзӣ ва нуриҳои минералӣ махсус зикр намуданд.