7109 ХОНАНДАИ НАВИ КИТОБХОНАИ ФИРДАВСӢ

Душанбе 22 октябр. (АМИТ «Ховар», Мавҷуда Анварӣ).-Тайи нӯҳ моҳи соли 2010 ба Китобхонаи миллии Ҷумҳурии Тоҷикистон ба номи Абулқосим Фирдавсӣ 4704 нусха адабиёти тозанашр, аз ҷумла 1926 нусха ба забони тоҷикӣ ворид гардида, 22920 нафар хонанда ба китобхона ташриф овардаанд, ки 7109 нафарашро хонандаи нав ташкил медиҳад.     Дар китобхонаи мазкур дар ин давра конфронсу нишастҳои илмӣ таҳти унвони «Нақши Ваҳдати миллӣ дар тарбияи ватандӯстӣ-истиқлолиятшиносӣ», «Душанбе-пойтахти фарҳанги исломӣ», «Корнамоии ҷовидонаи халқи тоҷик», «Ҳеҷ кас ва ҳеҷ чиз фаромӯш нашудааст», «Корупсия; проблема ва роҳҳои ҳалли он», «Рушди иттилооти илмӣ» ва Интернет-конфронси «Самтҳои гуногуни бунёд ва низоми электронӣ-китобдорӣ» баргузор гардиданд.     Бо мақсади таҳкими базаи модӣ-техникии китобхонаҳои мамлакат аз ҳисоби маблағҳои «Барномаи рушди фаъолияти китобдорӣ дар Ҷумҳурии Тоҷикистон барои солҳои 2006-2015» ба шӯъбаҳои фарҳанги шаҳру ноҳияҳои вилояти Суғд 20500 сомонӣ, вилояти Хатлон 37775 сомонӣ, ВМКБ 22275 сомонӣ, дар мачмӯъ 80550 сомонӣ интиқол дода шуд.    Дар ин бора Вазири фарҳанги ҶТ- Мирзошоҳрух Асрорӣ зимни нишаст ба хабарнигорон ВАО хабар дод.