НИЁЗИ ХОҶАГИИ КОММУНАЛӢ БА АЗНАВСОЗӢ

Душанбе, 13 октябр. (АМИТ «Ховар», Дилшодаи Ҷонмард).- Дар нӯҳ моҳи   соли равон корхонаҳои тобеи корхонаи воҳиди давлатии «Хоҷагии манзилию коммуналӣ» ба истифодабарандагон ба маблағи 39002,8  ҳазор сомонӣ хизмат расонидаанд, ки нисбат ба ҳамин давраи  соли 2009 13,2% зиёд аст. Аз рӯи натиҷаҳои ҳамаи намуди фаъолияти молиявии худ корхонаҳои соҳа 2514,1 ҳазор сомонӣ фоида ба даст оварданд, гуфт зимни нишасти матбуотӣ муовини аввали  директор Абдулҳамид Сайфуллоев. Маблағи хизматрасонии корхонаҳои фаръии ХМК 18563,9 ҳазор сомониро ташкил намуд, ки нисбат ба ҳамин давраи соли гузашта 15, 3% зиёд буда, маблағи фоида 1079,7 ҳазор сомониро ташкил додааст. Ҳамчунин, мавсуф  зикр намуд,  ки: «КВД «Хоҷагии манзилию коммуналӣ» пешбурди сиёсати ягонаи истифодабарӣ ва ҳамоҳангсозии соҳаи хоҷагии манзилию коммуналиро дар қаламрави ҷумҳурӣ таъмин намуда, масъалаҳои истеҳсолот, рушду азнавсозии соҳаи хоҷагии манзилию коммуналӣ, баланд бардоштани сифати хизматрасонии коммуналӣ, болоравии сатҳи истифодабарӣ ва нигоҳдории фонди манзил, тозагии санитарӣ дар шаҳрҳо ва марказҳои ноҳияҳои ҷумҳурӣ, (ба ғайр аз шаҳрҳои Душанбе, Хуҷанд, Чкалов, Норак, Сарбанд ва Роғун), таъмини гармӣ, обтаъминкунӣ ва канализатсия, бақайдгирии техникии иншооти гуногунро дар қаламрави ҷумҳурӣ таъмин менамояд».