АЗ УСТОХОНА ТО КОРХОНАИ ВОҲИДИ ДАВЛАТӢ

Душанбе, 11 ноябр. (АМИТ «Ховар», Лаззат Диловарзод).- Бино ба иттилои мудири бахши робита бо ҷомеаи Вазорати меҳнат ва ҳифзи иҷтимоии аҳолӣ Ф. Фозилов, Корхонаи воҳиди давлатии заводҳои протезию ортопедии (КВД ЗПО)   Агентии давлатии ҳифзи иҷтимоӣ, шуғли аҳолӣ ва муҳоҷират дар байни солҳои 1942- 2010 нӯҳ маротиба ивази ном кардааст.    Боис ба ёдоварист, ки 18 –уми апрели соли 1942 аз сабаби зиёд шудани маҷрӯҳони ҶБВ дар шаҳри Душанбе устохонаи маҳсулоти протезию ортопедӣ таъсис дода шуд. Соли 1963 ин устохона ба корхонаи протезбарории Вазорати таъминоти иҷтимоӣ сабти ном шуд. Соли 2000 – ум  ба ин корхона мақоми нав – Корхонаи давлатии ҷумҳуриявии заводи узвҳои ориятӣ дода шуд.    Аз соли 2001 корхона бо унвони Корхонаи давлатии заводи протезию ортопедии Вазорати меҳнат ва ҳифзи иҷтимоии аҳолӣ номгузорӣ гардид ва ниҳоят соли 2007  он номи Корхонаи воҳиди давлатии заводи протезию ортопедии Агентии давлатии ҳифзи иҷтимоӣ, шуғли аҳолӣ ва муҳоҷиратро гирифтааст.    Ҳоло дар Корхонаи воҳиди давлатии заводи протезию ортопедии шаҳри Душанбе 65 нафар коргарони баландихтисос кор мекунанд, ки 20 нафари онҳоро занон ташкил медиҳанд.    Корхона, ҳамчунин, дар шаҳрҳои Кӯлоб, Хоруғ ва Хуҷанд филиалҳои худро дорад ва дар як сол беш аз 4 ҳазор ҷуфт пойафзол барои маъюбон истеҳсол менамоянд.