ПАРЧАМ ИНЪИКОСГАРИ ТАЪРИХИ ДИРӮЗУ ИМРӮЗ

Душанбе, 24 ноябр. (АМИТ «Ховар», Покиза Маҳмадбекова). —  Бахшида ба рӯзи Парчами давлатии Ҷумҳурии Тоҷикистон 23 ноябри соли ҷорӣ дар Вазорати молияи Ҷумҳурии Тоҷикистон ҷамъомади тантанавӣ баргузор гардид. Вазири молияи Ҷумҳурии Тоҷикистон Сафаралӣ Наҷмиддинов ҷамъомади тантанавиро кушода, аҳли кормандони вазорат, идораҳо ва муассисаҳои зертобеи онро бо ин санаи таърихӣ табрик намуд. Ӯ аҳамияти  рӯзи Парчами давлатии Ҷумҳурии Тоҷикистонро, ки аз соли гузашта инҷониб дар кишвар рӯзи 24 ноябр таҷлил мегардад, зикр намуд.  С. Наҷмиддинов қайд кард, ки ин ид яке аз рӯйдодҳои таърихӣ ва муқаддас дар ҳаёти халқи тоҷик ва кишвар ба ҳисоб рафта, мақсад аз ҷашнгирии ин рӯз нишон додани эҳтиром ва ифтихор ба ин рамзи муҳими давлатӣ буда, он гузашта, ҳозира ва ояндаи таъриху тамаддуни халқи моро инъикос менамояд.