ҶАМЪБАСТИ ФЕСТИВАЛ-ОЗМУНИ ВИЛОЯТИИ ЖУРНАЛИСТИКАИ ЭКОЛОГӢ

Душанбе, 20 декабр. (АМИТ «Ховар», Бекназари Абӯбакр). — Дар Кохи Рӯдакии шаҳри Хуҷанд  маросими  ҷамъбасти фестивал — озмуни вилоятии журналистикаи экологӣ баргузор гардид. Дар он намояндагони  мақомоти иҷроияи ҳокимияти давлатии вилояти Суғд, ташкилоти ҷамъиятии «Гурӯҳи ҷавонон  оид ба ҳифзи муҳити зист», Маркази иттилоотии экологии «Орхус» дар вилояти Суғд, Иттифоқи журналистони вилояти Суғд ва Сафорати ИМА дар Тоҷикистон  иштирок намуданд. Аз хадамоти матбуоти раиси вилояти Суғд ба АМИТ «Ховар» иттилоъ доданд, ки ҳакамон  пас аз баррасии маводи фестивал – озмун, ҳам дар матбуоти даврӣ ва ҳам дар воситаҳои электронии иттилоотӣ, ба маводи пешкашнамудаи  рӯзноманигорони «Азия Плюс», «Ҳақиқати Суғд», «Тирози ҷаҳон», «Стан-ТВ», «СМ-1» ва телевизиони вилояти Суғд бартарӣ доданд. Рӯзноманигорон Тилав Расулзода, Маъмури Юсуфзод, Ислом Бобоев, Саид Шодиев, Бобоҷон Қурбонов, Насиба Мамадҷонова ва рӯзноманигори собиқадор Муҳаммадҷон Абирӣ бо мукофотҳои таъсиснамудаи кумитаи тадорукот  сарфароз гардонида шуданд.