ҶАВОНОН ЗИДДИ ФАСОД

Душанбе,  8 декабр. (АМИТ «Ховар»,  Дилшодаи Ҷонмард). –  Бо мақсади густариши ҷаҳонбинӣ ва  бад-ин васила мусоидат намудан  дар ба вуҷуд овардани фазои зиддикоррупсионӣ миёни ҷавонон, дар доираи чорабиниҳои бахшида ба Рӯзи умумиҷаҳонии мубориза бар зидди коррупсия, санаи 8 декабр   вохӯрии  Раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Маликшо Неъматов бо донишҷӯёни Донишгоҳи технологии Тоҷикистон дар мавзӯи «Зуҳуроти коррупсионӣ ва оқибатҳои ногувори он» ҷараён гирифт. Раиси  Кумита  зимни суханронии худ оид ба  дасттовардҳои тӯли 20 соли Истиқлолият соҳиб гаштаи Ҷумхурии Тоҷикистон муфассал  маълумот  дода, ҷавононро  барои  созандагӣ,   ободкорӣ, мубориза зидди фасод ва бо дасту  дили пок хизмат намудан ба халқу ватан даъват намуд.           Ректори  Донишгоҳ Нуралӣ  Шоев  мулоқоти  раиси  Кумитаро  саривақтӣ  арзёбӣ  намуда,  аз  номи  ҷавонон раиси  Кумитаро  бовар  кунонид,  ки  донишҷӯёни  ин  муассисаи  таълимӣ бо  ихтирооти  нав  дар  таҳкими сулҳу  шукуфоии кишвар  ҳиссаи  арзанда  мегузоранд.            Дар  поёни  мулоқот  донишҷӯён  ба ташаббускорони  мулоқот изҳори миннатдорӣ намуда, бо  саволҳои  худ аз раиси  Кумита Маликшо  Неъматов  посух  гирифтанд.