МУЛОҚОТИ Э. РАҲМОН БО ЖАН-МАРИ ХАЛСДОРФРО

 Душанбе, 6 декабр. (АМИТ «Ховар»)- 6 декабр Президенти Ҷумҳурии Тоҷикистон Эмомалӣ Раҳмон Вазири мудофиа ва корҳои дохилии Люксембург Жан-Мари Халсдорфро ба ҳузур пазируфт. Дар мулоқот масоили ҳамкории Тоҷикистону Люксембург дар чаҳорчўби муносибатҳои дуҷониба ва ҳам дар доираи Иттиҳоди Аврупо ва нерўҳои эътилофии посдори сулҳ дар Афғонистон баррасӣ шуд. Зимни баррасии масоили дуҷониба Жан-Мари Халсдорф аз номи роҳбарияти давлати Люксембург Сарвари давлати Тоҷикистон Эмомалӣ Раҳмонро даъват намуд, ки барои такони нав бахшидан ба ҳамкории судманди ду кишвар соли оянда ба ин кишвари Аврупо сафари расмӣ анҷом диҳад.   Жан-Мари Халсдорф ба Сарвари давлат Эмомалӣ Раҳмон барои мусоидати фаъоли Тоҷикистон ба барқарорсозии иқтисодиёт ва ҳаёти осоиштаи Афғонистон ва ҳамкории пурсамар бо нерўҳои эътилофии посдори сулҳ дар ин кишвар арзи сипос намуд. Зимни сўҳбат доир ба дурнамои авзои Афғонистон, таъсири он ба кишварҳои минтақа ва ҷаҳон ва  роҳҳои пешгирӣ аз истеҳсолу гардиши маводи мухаддир ва паҳншавии терроризму экстремизм аз ин кишвар гуфтугўйи судманд сурат гирифт.